Vel lukkaðir tónleikar í kvöld

Það ríkir alltaf eftirvænting í loftinu þegar spila á í nýju húsi.  Eins og áður hefur komið fram spilaði hljómsveitin þó í sömu húsum í Köln og Duesseldorf árið 2003, en síðan hefur hljómsveitin ekki farið utan.  Aðstaðan og hljómburður bíósins á Melunum er því það sem fólk á að venjast.  Bæði í gær og í dag var ólýsanlega gaman að spila í þessum frábæru tónleikahúsum.  Hljóðfæraleikararnir heyra betur í sínum hljóðfærahópum sem og öðrum sem gerir allt samspil mun auðveldara.  Einnig er mikill munur á því hversu skýr öll blæbrigði verða.  Mikið óskaplega verður nú gaman þegar nýja húsið okkar við höfnina verður í höfn!!

Tónleikarnir í kvöld voru yfirvegaðri en í gær enda fólk búið að anda frá sér fyrsta tónleika-stressinu.  Efnisskrá tónleikanna í kvöld var Trílógía eftir Jón Leifs, Tilbrigði við stef eftir Paganini eftir Rachmaninoff og svo var Sibelius endurtekinn frá því í gær.  Einleikaranum okkar hefur verið mjög vel tekið bæði í gær og í dag, enda frábær píanisti á ferð.  Fagnaðarlætin eftir Sibelius voru heldur engu minni í kvöld en í gær og eftir undurfallegt aukalag eftir Walton kom rúsínan í pylsuendanum Á SPRENGISANDI.  Það er eins og Þjóðverjar falli í trans yfir grípandi laginu og þeir sem áður virtust settlegir og dannaðir skipta um ham, stökkva á fætur eins og um handboltaleik væri að ræða og bravóa í bak og fyrir.  Og þá loks finnum við til samkenndar með hinum íþróttamönnum þjóðarinnar og verðum voða stolt af því að vera "strákarnir" (eða sko hljómsveitin) ykkar.

JAH

Næsta stopp: Duesseldorf

Ég held ég neyðist til að taka til baka það sem ég sagði um tónleikasalinn í Köln, það var greinilega misminni. Þessi salur var frábær, mjög þægilegt að spila, maður heyrði bæði vel í sjálfum sér og í öðrum. Hann er líka þannig úr garði gerður að hann hefur mjög mikla dýnamíska breidd, hinir sterkustu staðir njóta sín mjög vel sem og þagnirnar, sem verða mjög áhrifamiklar. Í eftirmiðdaginn förum við til Duesseldorf sem er sirka klukkkustundar akstur héðan. Þar skilst okkur að sé e-ð búið að eiga við akústikina síðan við vorum þar síðast, enda var hún ekkert sérstök. Tonhalle í Duesseldorf er mjög sérstakt hús í laginu, það hýsti stjörnuskoðunarsafn (planetarium) áður en það var gert að tónleikahúsi. HOE.

Nokkrar myndir frá Fílharmoníunni

Sjá myndaalbúm. HOE.

Gífurleg fagnaðarlæti eftir vel heppnaða tónleika í Köln

Eftir vel heppnaða tónleika í Köln ætlaði fagnaðarlátunum seint að linna. Rumon Gamba, aðalhljómsveitarstjóri, greip til þess ráðs eftir fjögur aukalög að taka báða konsertmeistarana með sér útaf sviðinu og hljómsveitin fylgdi á eftir.  Á efnisskránni var forleikur að Galdra Lofti eftir Jón Leifs, píanókonsert eftir Grieg og önnur sinfónía Sibeliusar.
Hljómsveitarmeðlimir voru sammála um að hljómburður hússins væri frábær, strengirnir hljómuðu frábærlega og var samanburðurinn við Háskólabíó bíóinu frekar óhagstæður, svo ekki sé meira sagt.
Meðfylgjandi er mynd sem undirritaður tók á æfingu, vonandi fylgir eitthvað meira á morgun, einhverjir voru með vídeovélar og er stefnan að setja valin skot á vefinn í fyrramálið.

RÓ. 

Köln

Ferdalagid hingad til Kölnar gekk agaetlega og folk vid goda heilsa, synist mer, tilbuid i slaginn fyrir kvöldid, svo madur stelist adeins i likingamal ithrottanna. Eda eins stundum er sagt her i Thyskalandi: Neuer Tag, Neues Glück!

HOE

Leifsstöð

Atvikið við bensínstöðina í Garðabæ í morgun náðist því miður ekki á myndband. Allir eru þó heilir á húfi og bíða spenntir brottfarar. Bakkusi konungi hefur aðeins brugðið fyrir. HOE

Fílharmonían í Köln

Þegar við spiluðum í Þýskalandi síðast byrjuðum við einnig tónleikaferðina í Köln. Frábær salur en mjög stór, yfir 2000 sæti ef ég man rétt. Það hefur ákveðna kosti og galla. Mig minnir að maður hafi ekki heyrt neitt sérstaklega vel í öðrum hljóðfærum á sviðinu, en það kann að vera misminni. Hinsvegar höfum við aðeins lengri æfingu á mánudaginn fyrir tónleikana en síðast, sem er ágætt, til þess að venjast hljómburði salarins. Myndin til vinstri er tekin á æfingunni í salnum árið 2003. HOE

Frjáls!?

2 dagar í brottför. Það á þó ekki við um hljóðfærin sem voru tekin af okkur í hádeginu í dag. Það er ekki einfalt að flytja heila sinfóníu milli landa, sérstaklega stærri hljóðfærin. Flest þeirra fara til Liege í nótt með fraktflugi í sérstökum kössum. Eins gott að við sjáum þau heil á húfi í Köln á sunnudaginn! Hljóðfæraleikara er yfirleitt illa við að skilja við sig hljóðfærið en því fylgja vissulega kostir. Hvað á maður af sér að gera fram á sunnudag?

HOE